འཇིག་རྟེན་གྱི་ཟློས་གར་དེ་ལས་བཟློག་ན་བསམ་གྱི།

 འཇིག་རྟེན་གྱི་ཟློས་གར་དེ་ལས་བཟློག་ན་བསམ་གྱི།

ལས་དབང་གིས་སྤར་བའི་རེ་བའི་མར་མེའི་སྣུམ་ནི་ཟད་ལ་རན་ཞིང་ངེས་མེད་ཀྱི་དྲག་རླུང་ཁྲོད་ལུས།
ད་ནི་མ་འོངས་མུན་ནག་གིས་འཐིབས་པའི་ཀློང་ན་ཆག་སྒོ་དང་རེ་དོགས་ཀྱི་གདོན་འདྲེ་ཐུག་ཡོང་སྙམ་པའི་ཞེད་སྣང་དང།
མི་ཚེའི་མདུན་ལམ་གྱི་ལམ་བུར་གོམ་པ་བསྐྱོད་ཐུབ་མི་ཐུབ་ཀྱི་གདེང་སྤོབས་ཀྱི་རྒྱ་མཚོ་ནི་ཉི་མ་བདུན་གྱིས་རབ་ཏུ་སྐེམས།
ཁ་སང་གཡང་གཟར་ནའང་བསྐྱོད་དེ་མ་གིའི་སྣང་བརྙན་ཡུལ་དུ་བྱེད་ནའང་། ད་ནི་གཡང་གཟར་བློ་ངོར་ལན་ཅིག་འཁོར་བ་ཙམ་གྱིས་ལུས་འདར་སིག་གིས་བསྡམས།
ཁ་སང་ལོང་བ་དམིགས་བུས་འཁྲིད་དེ་འཇིག་རྟེན་མི་ཡུལ་གང་འཚམས་འགྲིམས་ནའང་ད་རིང་དམིགས་བུ་ཉིད་སེམས་འཁྲལ་དང་རེ་བའི་མིག་ཟུང་ཉམས་ཏེ་ལོང་བ་གཅིག་པུར་ལུས།
ས་གཞི་ཡངས་པའི་ངོས་ལ་ཆུ་ལུད་དྲོད་གཤེར་ཚང་བའི་ལོ་ཏོག་ཕུན་སུམ་ཚོགས་པ་སྨིན་མོད། ད་ནི་ཉི་མ་སྤྲིན་པས་བསྒྲིབས་ཤིང་བརླན་གཤེར་སྤྲིན་པས་བརྐུས་ཏེ་ནམ་མཁའི་མཛོད་དུ་བསྐུངས་ནས་ལོ་ཏོག་དལ་གྱིས་རྒུད་དུ་ཕྱིན།
ངེས་མེད་ཀྱི་མདུན་ལམ། གཉེན་སྤུན་མཆེད་སྐྱོང་བའི་དཀའ་ངལ། གྲོགས་ཕོ་མོའི་རྩོད་གླེང་། སང་ཉིན་འཆི་ཡོང་བསམ་པའི་འཇིགས་སྐྲག། མ་འོངས་ཅི་བྱུང་བསམ་པའི་ཞེད་སྣང། བཟའ་རྒྱུ་འཐུང་རྒྱུ་ཅི་ཡང་མེད་པར་འགྱུར་བའི་སེམས་འཁྲལ་སོགས་ཚེ་འདིའི་དཀའ་སྡུག་སྣ་ཚོགས་ལན་ཅིག་མྱུར་བར་རྩད་ནས་བཀག་དགོས་བསམ་གྱི། ཚེའི་འདིའི་སྣང་བ་དེ་བསྣུབས་ན་བསམ་གྱི། འཇིག་རྟེན་གྱི་ཟློས་གར་དེ་ལས་བཟློག་ན་བསམ་གྱི།

 

སྤྱི་ལོ་ ༢༠༢༣ ཟླ་བ་ ༡༡ ཚེས་ ༤ ལ་སྤེལ།
ཝཱ་ཎ་གསལ་ལྡན་གྱི་གྲོང་།